मकवानपुर। बागमती प्रदेशका स्वास्थ्य मन्त्री किरण थापाले मदन भण्डारी स्वास्थ्य विज्ञान प्रतिष्ठानले अन्तर्गत संचालित हेटौँडा अस्पतालको सेवा तथा भवन निरीक्षण गरेका छन्।
निरीक्षणका क्रममा मन्त्री थापाले प्रतिष्ठानले सञ्चालनमा ल्याएको बीएस्सी नर्सिङ , बिपिएच, बिएमएलटी, बी फर्मा कार्यक्रमहरूको प्रशंसा गर्दै एमबीबीएसको पूर्वतयारीमा लाग्न आग्रह गरे । हाल सञ्चालनमा रहेको बीएस्सी नर्सिङ कार्यक्रमको सिट संख्या २० बाट बढाएर ४० पुर्याउन तयारीमा प्रतिष्ठानले तयारी गरेको छ ।
प्रतिष्ठानका उपकुलपति डा.प्रदिप ज्ञवाली, शिक्षाध्यक्ष डा. दिनेश कुमार लम्साल, रजिस्ट्रार भीमसागर गुरागाईं, निर्देशक डा.रामचन्द्र सापकोटा, अस्पताल सञ्चालन तथा व्यवस्थापन समितिका सदस्य उत्सव चौलागाईं , लक्ष्मी पौडेल, पूर्व सदस्य हिरा लामा लगायत चिकित्सक एवम अन्य कर्मचारीहरुको सहभागिता थियो ।
स्वास्थ्य मन्त्री थापाले चिकित्सा शिक्षा आयोगको मापदण्ड अनुसार सबै पूर्वाधार र शैक्षिक तयारीलाई पूर्णता दिने भन्दै प्रदेश सरकार पूर्ण प्रतिबद्ध रहेको बताए ।
निरीक्षणमा बागमती प्रदेश सभा सदस्य एका लाल श्रेष्ठ पनि सहभागि थिए । उनले अस्पतालले समग्र स्वास्थ्य सेवा प्रवाहमा देखाएको कार्य सराहनीय भएको बताए । यसलाई कायम राख्नुपर्ने उनको भनाई छ । जनताको गुनासो आइरहने भन्दै यसबाट आत्तिन नहुने उनले बताए ।
प्रतिष्ठानको तर्फबाट उपकुलपति डा.ज्ञवालीले प्रतिष्ठानलाई एमबीबीएस कार्यक्रम सञ्चालन गर्ने आधार निर्माण भइसकेको बताउँदै, अब चिकित्सा शिक्षा आयोगको स्वीकृतिको पर्खाइ मात्र रहेको उल्लेख गरे ।
