मकवानपुर । गणतन्त्र दिवस-२०८२ को अवसरमा बागमती प्रदेश प्रमुख दीपक प्रसाद देवकोटाले शुभकामना व्यक्त गरेका छन् ।
‘यस ऐतिहासिक तथा गौरवपूर्ण अवसरमा बागमती प्रदेश, स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरूमा हार्दिक शुभकामना व्यक्त गर्दछु’ उनको सन्देशमा छ ।
उनले आजको स्वर्णिम दिन ल्याउन आफ्नो प्राणको आहुती दिने ज्ञात अज्ञात शहीदहरूप्रती श्रद्धाञ्जली अर्पण गरेका छन् ।
संघीय लोकतान्त्रिक गणतन्त्र नेपालको राजनैतिक इतिहासको एक महत्वपूर्ण उपलब्धि भन्दै उनले यो नेपाली जनताको लामो संघर्ष, बलिदान र अथक प्रयासको देन भएको उल्लेख गरेका छन् ।
उनले भनेका छन्,‘ऐतिहासिक जनआन्दोलन २०६२/०६३ को सफलतासँगै मुलुकमा स्थापित गणतन्त्रले नेपाली जनतालाई सार्वभौमसम्पन्न बनाउँदै सबैलाई राष्ट्रनिर्माणको मूल प्रवाहमा समाहित गरेको छ । ’
देशमा सबैखाले निरंकुशताविरुद्ध सम्पूर्ण राजनैतिक दल र आमनागरिक समाज एकजुट भएर इतिहास बदलेजस्तै गणतन्त्र, राष्ट्रियता र जनजिविकाको सवालमा पार्टीगत स्वार्थ र सिद्धान्त त्यागेर एकढिक्का भई सकारात्मक सन्देश प्रवाह गर्न जरुरी रहेको उनको भनाइ छ ।
संघीय लोकतान्त्रिक गणतन्त्रको अभ्यासबाट देशमा सुशासन र समृद्धि भित्र्याउन सकिने हुँदा यसलाई संस्थागत गरी समृद्ध देश निर्माणका दिशामा सबै लाग्नु पर्नेमा उनको जोड छ।
