सामसंगले केही समय अघि नेपाली बजारमा आफ्नो प्रमुख स्मार्टफोन नोट ९ सार्वजनिक गरेको थियो । विश्वव्यापी रूपमा चर्चित यो मोडल नेपाली बजारमा पनि प्रिमियम स्मार्टफोनको रूपमा लोकप्रिय छ । सामसंग नेपालले सार्वजनिक गरेको नोट ९ प्रयोगकर्ताको अनुभव के कस्तो छ भन्ने हाम्रो अवलोकनमा आधारित विवरण प्रस्तुत गरिएको छ । हरेक वर्ष सामसंगको नोट सिरिज सार्वजनिक हुँदा प्रायः कार्यालयीन र रचनात्मक पेशामा संलग्न व्यक्तिहरूले प्रयोग गर्ने देखिन्छ । तर यस वर्ष नोट ९ले सेल्फी प्रेमी र गेम खेल्ने युवापुस्तालाई पनि लक्षित गरेको देखिन्छ । ब्लुटुथ-सक्षम एस पेन, खेल खेल्ने सुविधा र फोर्टनाइट जस्ता लोकप्रिय खेलहरू मोफत समावेश गरेर युवापुस्तालाई आकर्षित गर्न कम्पनीले नयाँ कदम चालेको छ ।
फोनको डिजाइनमा नोट ९ अरू फोनभन्दा अलिक ठुलो र चौडा छ, जसले गर्दा एक हातले प्रयोग गर्न केही चुनौतीपूर्ण हुन सक्छ । तौलमा पनि अलि भारी छ र साधारण जिन्स पेन्टको गोजीमा अलिक् बाहिर देखिन्छ । तर, स्क्रिन भित्रको सामग्रीलाई सानो पार्ने सुविधा रहेकोले प्रयोगकर्तालाई सहजता दिन्छ । पछाडिको म्याट फिनिशले फोनलाई चिप्लिनबाट रोक्छ भने गोलो कुनाहरूको सट्टा अलिक तिखो किनाराले प्रिमियम अनुभव थप्दछ । एस पेनको बाह्य डिजाइन पहिले जस्तै भए पनि भित्री हार्डवेयर र ब्लुटुथ जडानले सेल्फी खिच्न, प्रेजेन्टेसन दिने जस्ता कार्यलाई सजिलो बनाएको छ । डिस्प्ले ६.४ इन्चको सूपर एमोलेड क्वाड एचडी रहेकोले दृश्य सामग्री अत्यन्तै स्पष्ट र पढ्न सहज हुन्छ । घाममा पनि उज्वल डिस्प्लेले सामग्री सजिलै देख्न सकिन्छ ।
क्यामरा फिचरमा नोट ९ उत्कृष्ट छ । अगाडि ८ मेगापिक्सेल क्यामराले अँध्यारोमा पनि स्पष्ट तस्बिर खिच्छ भने पछाडि १२+१२ मेगापिक्सेलको डुअल क्यामरा एआई फिचरसहित उत्कृष्ट प्रदर्शन दिन्छ । एआई फिचरले देखिएको दृश्य अनुसार सेटिङ स्वतः मिलाएर तस्बिर सुधार गर्छ भने स्थिरीकरण सुविधा हल्लिएको तस्बिर र भिडियो स्थिर बनाउँछ । ४००० एमएएच ब्याट्री र फास्ट चार्जिङ सुविधा फोनलाई दिनभर सहज चलाउन पर्याप्त छ । सामसंगले आफ्नो सफ्टवेयर सुधार गरेर प्रदर्शनमा स्लो वा ह्याङ हुने समस्या न्यून पारेको छ । गेम खेल्दा पनि लिक्विड कुलिंग सुविधाले तापक्रम नियन्त्रण गर्छ । हाम्रो अनुभव अनुसार फोनको समग्र प्रदर्शन उत्कृष्ट छ, धेरै मेमोरी खपत गर्ने एप्स चलाउँदा पनि स्लो भएको देखिएन र फोन उल्लेखनीय रूपमा तत्किएन ।
नोट ९ का सवल पक्षहरूमा ठुलो र सुन्दर डिस्प्ले, लामो टिक्ने ब्याट्री, फास्ट प्रदर्शन, मेमोरी व्यवस्थापन र सुधारिएको एस पेन पर्छ । निराशाजनक पक्षमा भने पुरानो डिजाइन र फिंगरप्रिन्ट रिडरको असजिलो स्थान रहेका छन् । निष्कर्षमा, नोट ९ मा सोच्न सकिने सबै सुविधाहरू समावेश छन् । डिजाइन पुरानो जस्तो भए पनि फोन आकर्षक छ र नेपाली उपभोक्ताका लागि मूल्य योग्य छ । नोट ९ किन्न चाहने वा यसको अनुभवबारे जानकारी लिन चाहने प्रयोगकर्ताले प्रत्यक्ष प्रतिक्रिया दिन सक्नेछन् ।
