कृष्ण अग्रवाललाई जिताउन महेन्द्र राउत घरदैलोमा खटिए
हेटौंडा– मकवानपुर उद्योग वाणिज्य संघको ९ कार्तिमा हुने निर्वाचनमा आफैं अध्यक्ष पदको उम्मेदवार बताउँदै आएका महेन्द्र राउतले अन्ततः कृष्णकुमार गुप्ता (अग्रवाल)लाई सहयोग गर्ने भएका छन् ।
महेन्द्र राउतले संघको अध्यक्ष पदका उम्मेदवार कृष्णकुमार गुप्ता (अग्रवाल)लाई जिताउन मत माग्दै घरदैलोमा खटिएका हुन् । राउतले अग्रवाल प्यानललाई जिताउन मतदाता व्यवसायीलाई आग्रह गरेका छन् ।
मंगलबार हुने निर्वाचनमा राउतले आइतबार अग्रवाल प्यानललाई सहयोग गर्ने भनी प्रतिवद्धता गर्दै हेटौंडा बजारका व्यवसायीमाझ मत मागेका छन् । उनी गत निर्वाचनमा कृष्ण कटुवालसँग पराजित भएका थिए ।
तीन जनाको प्यानलसहित उम्मेदवारी रहेकोमा केहि दिन अघिदेखि राउत प्यानलका उम्मेदवार अग्रवाल प्यानलमा समिकरण भएपश्चात राउत आजबाट खुलेर लागेका हुन् । संघको नयाँ समितिका लागि अर्का अध्यक्ष उम्मेदवार राजकुमार न्यौपाने प्यानल लागि परेको छ ।
यी दुवै प्यानलबाट भोली सोमबार उम्मेदवार दर्ता भएसँगै मंगलबार निर्वाचन प्रक्रिया अघि बढ्ने संघले जनाएको छ ।
