हेटौंडाका मिलन दंगाल हत्या अभियोगमा चार जना युवतीसहित ७ जना पक्राउ
२१ चैत, हेटौंडा । हेटौंडा उपमहानगरपालिका-१६ चिसापानी घर भएका ३८ वर्षीय मिलन दंगालको हत्या अभियोगमा सात जना पक्राउ परेका छन ।
पक्राउ पर्नेमा मृतक दंगालको साथी (नातामा भतिजा पर्ने) र चार जना युवतीसमेत रहेको जिल्ला प्रहरी कार्यालय मकवानपुरले जानकारी दिएको छ । दंगालको शव पूर्वीमकवानपुरको बागमती गाउँपालिका र बकैया गाउँपालिकाको सिमा क्षेत्र भुवनचुलीडाँडामा २० चैत बुधवार बिहान साढे ६ बजे फेला परेको थियो ।
देउडी भज्याङबाट करिब ५० मिटर तल लडेर मदनभण्डारी लोकमार्गको भुवनचुलीस्थित दायाँतर्फको नालामा टाउकोमा गम्भीर चोट लागेको अवस्थामा दंगालको शव भेटिएको मकवानपुरका प्रहरी नायव उपरीक्षक श्यामु अर्यालले जानकारी दिए ।
डिएसपी अर्यालका अनुसार मृतक दंगाल र उनका साथी सुजन पौडेल १९ चैत साँझ मंगलबार मोटरसाइकलमा हेटौंडाबाट भुवनचुली भन्दा माथि रहेको देउडी सेकुवा घरमा पुगेका थिए ।
उनीहरू सोही दिन सेकुवा घरमा रहेको र त्याहाँ झडप भएपछि घटना घटेको प्रहरी अनुसन्धानबाट खुलेको छ । यद्यपि, आरोपितहरूले घटनामा संलग्नता रहेको बारे स्वीकार गरिनसकेको डिएसपी अर्यालले अनलाइनखबरलाई जानकारी दिए ।
प्रहरीले घटनामा संलग्न भएको आरोपमा दंगालका साथी पौडेल, बकैया गाउँपालिका–३ बस्ने ३६ वर्षीय प्रशान्त लामा र ललितपुर गोदावारी नगरपालिकापा–१२ घर भएका २४ वर्षीय किसन दानीलाई पक्राउ गरेको डिएसपी अर्यालले बताए ।
उनका अनुसार लामा सेकुवा घरका सञ्चालक हुन भने दानी सेकुवा घरको सम्पर्कमा सञ्चालित टाटासुमोका चालक हुन । उक्त टाटासुमो सेकुवा घरमा आउने ग्राहकहरूलाई ओहोरदोहोर गराउन प्रयोग हुने गरेको थियो ।
यसैगरी, प्रहरीले घटनामा संलग्न भएको आरोपमा बाराको निजगढ नगरपालिकापा–३ बस्ने १९ वर्षीया इनिसा तिमल्सेना, हेटौंडा उपमहानगरपालिका–१५ बस्ने १९ वर्षीया सुस्मिता तामाङ, सिन्धुलीको मरिण गाउँपालिका–७ घर भएकी २० वर्षीया शर्मिला मुक्तान र सोही स्थानकी १९ वर्षीया रोजिना तामाङलाई पनि पक्राउ गरेको छ ।
चार जना युवतीहरु सेकुवा घरमा काम गर्ने गरेको प्रहरीले जनाएको छ । सेकुवा घरमा शंकास्पद गतिविधिसमेत हुने गरेको प्रहरीको प्रारम्भिक अनुसन्धानबाट खुलेको छ ।
घटनास्थल भनिएको सेकुवा घर रहेको देउडी भञ्ज्याङ इलाका प्रहरी कार्यालय फापरबारी र प्रहरी चौकी हात्तिसुँढेको मध्य भागमा दुवै क्षेत्रबाट करिब ४ किलोमिटरको दुरीमा रहेको छ ।
प्रहरीले आरोपित ७ जनालाई ज्यान सम्बन्धी कसुरको मुद्दामा मकवानपुर जिल्ला अदालतबाट बिहीवार ७ दिनको म्याद थप गरेको छ । प्रहरीले आरोपितहरूको बयान लिने र घटनाको अनुसन्धान भइरहेको जनाएको छ ।
लोकप्रिय
