चुच्चेखोला वनमा डढेलो रोकथाम गर्न जनचेतना, पत्कर सोर्दै, आगो लाउँदै
हेटौंडा । चुच्चेखोला सामुदायिक बन उपभोक्ता समितिले वनमा लाग्ने डढेलो रोकथाम गर्न जनचेतना मूलक कार्यक्रम आयोजना गरेको छ ।
डिभिजन वन कार्यालय मकवानपुरले वनमा डढेलोबाट हुने क्षति र रोकथामका लागि उक्त कार्यक्रम सञ्चालन गरेको हो । यस कार्यक्रमको आयोजन हेटौंडा उपमहानगरपालिका–१७ र मकवानपुरगढी गाउँपालिका–२ स्थित समितिको वन क्षेत्रका विभिन्न स्थानमा गरिएको थियो ।
डिभिजन वन कार्यालय, मकवानपुरका डिभिजन वन अधिकृत राकेश प्रसाद चन्द्रवंशीको उपस्थितिमा आयोजित जनचेतना कार्यक्रममा वन डढेलो लाग्न सक्ने जोखिमलाई न्यूनिकरण गर्न सडक क्षेत्रको पत्कर संकलन गरेर नष्ट गरिएको हो । चन्द्रवंशीले वन डढेलोका कारण वातावरण प्रदूषण साथै वनमा आश्रित जीवहरुको क्षति बढ्दै गएको उल्लेख गर्दै कुनै पनि हालतमा वनमा आगो लाग्नबाट जोगाउनु पर्ने बताए ।
वन डढेलो रोक्नका लागि कुनै कसर बाँकी नराखेको जानकारी पनि दिए । कार्यक्रमका दौरान, चुरोट र विडीका ठुटा जथाभावी फाल्दा डढेलो लाग्न सक्ने भएकाले सडक क्षेत्रको पत्कर संकलन गरेर नष्ट गरिएको चुच्चेखोला सामुदायिक बनका अध्यक्ष लक्ष्मण कटुवालले जानकारी दिए ।
उनले भने, ‘जनचेतना र डढेलो जोखिम क्षेत्र नष्ट गरी हामी चुच्चेखोला सामुदायिक वन जोगाउँछौं ।’ कार्यक्रममा सहभागी करिब ५० घरका उपभोक्ता, डिभिजन वनका प्राविधिक, स्थानीय जनप्रतिनिधि, सुरक्षाकर्मी लगायतकको टोलीले सडक वरपारको पत्करलाई संकलन गरी जलाएर नष्ट गरिएको थियो ।
उक्त कार्य हेटौंडा–१७ सालक पार्कदेखि मकवानपुरगढी–२ शिखरकेटी हुँदै भालुन्टारसम्मको गरिएको वनका सचिव केदार प्रसाद घिमिरेले बताए । उनले भने, ‘बाटो सफा गरौँ, सुरक्षित तरिकाले ढडाउँ, ताकि पुनः डढेलो नलागोस् ।’
गत बर्षहरुमा डढेलोका कारण चुच्चेखोला वन जोगिन सकेको थिएन । डढेलोले वनमा रहेका मृग, सालक लगायतका बन्यजन्तु र चराचुरुङ्गीहरुको बासस्थान नष्ट भएको थियो ।
त्यसैको ध्यानमा राख्दै, यसपटक वनमा डढेलो नलागोस् भन्ने उद्देश्यले छिमेकी वनहरुसँग सहकार्य गरेर संयुक्त प्रयास गरिएको उपाध्यक्ष उमेश अधिकारीले बताए । उनले थपे, ‘वनमा आगो लागेको खण्डमा नियन्त्रणका लागि जनशक्ति तयारी अवस्थामा रहेका छन् ।’
लोकप्रिय
