दिनभरको वार्ता बेकामे, साँझ सूचना टाँसेर बागमती प्रदेशसभा बैठक स्थगित
हेटौंडा । आज दिउँसो १ बजे बस्ने तय भएको बागमती प्रदेशसभा बैठक साँझ सूचना टाँस गरेर स्थगित गरिएको छ । अब बुधबार दिउँसो १ बजेसम्म बैठक बस्ने भएको छ ।
प्रतिपक्ष र सत्तापक्ष दलहरुबीच बजेट माथिको विवाद कायमै रहेपछि प्रदेशसभाको बैठक बुधबार १ बजेका लागि सारिएको हो । मंगलबार दिउँसो १ बजेका लागि आह्वान भएको प्रदेशसभा बैठक दलहरुबीच सहमती हुन नसक्दा दिउँसो ४ बजेसम्मका लागि सारिएको थियो ।
सभामुख भुवनकुमार पाठकसहित मुख्यमन्त्री बहादुर सिंह लामालगायत विपक्षी दलका नेताहरुको दिनभरको वार्ता बेकामे बनेको थियो । ४ बजे आह्वान गरेको बैठक पनि बस्ने अवस्था नरहेपछि सूचना टाँस गरेर बुधबार १ बजेका लागि बैठक स्थगित गरिएको हो ।
मंगलबार बसेको प्रदेशसभामा प्रतिनिधित्व गर्ने ७ दलको बैठकपछिको कार्य व्यवस्था परामर्श समितिको बैठकले बुधबार १ बजेसम्मका लागि बैठक सार्ने निर्णय गरेको हो ।
प्रदेशसभा सभामुख भुवनकुमार पाठकका अनुसार दलहरुबीच विगतको बजेटमाथिको सहमतिका विषयहरु समेट्ने सहमति बनेको र सोहीअनुसार बैठक आह्वान गरिएको हो । उक्त बैठकमा प्रदेशसभाका समितिमा तयार भएका संशोधन विधेयकका प्रतिवेदनहरु पेश हुने कार्यसूचि रहेको उनले बताए ।
उक्त विधेयकका प्रतिवेदनहरुलाई छलफल गरेर पारित गर्नुपर्ने भएकाले केही दिन प्रदेशसभा चलाउने गरी विषेश समयको कार्यसूचि राखेर बैठक संचालन गरिने उनको भनाई छ ।
लोकप्रिय
