मकवानपुर गोल्डकपको तयारी पूरा, उद्घाटनमा मकवानपुर र सिमरा भिड्ने
हेटौडा– यही माघ २८ देखि फागुन ११ गतेस्म्म हुने स्थानीय तह शहिद स्मृति अन्तर्राष्ट्रिय मकवानपुर गोल्डकपको पाँचौं संस्करणको तयारी पूरा भएको आयोजक मकवानपुर जिल्ला फुटबल संघले जनाएको छ ।
हेटौंडा उपमहानगरपालिका–५, स्थित पिप्ले क्याम्पा रंगशालामा हुने गोल्डकपको तयारी बारे जानकारी दिन बिहीवार पत्रकार सम्मेलन गरिएको थियो । संघका अध्यक्ष टिका लामाले प्रतियोगिताको तयारी सकिएको बताए ।
पत्रकार सम्मेलनका प्रमुख अतिथि हेटौंडा–४ का वडा अध्यक्ष नवीन सिग्देलले राष्ट्रियस्तरको गोल्डकप आयोजनाले जिल्लाको पहिचान दिलाएको बताए । उनले गोल्डकप आयोजनाले खेलाडी उत्पादनमा मद्दत पुगेको बताए ।
मकवानपुर गोल्डकपलाई सबै क्षेत्रबाट सहयोग आवश्यक रहेको भन्दै जिल्लाका सम्बन्धित स्थानीय तहहरुले पनि आ–आफ्नो क्षेत्रमा खेलकुद गतिविधिलाई प्राथमिकतामा दिएकोमा खुशी व्यक्त गरे ।
उनले जिल्लाका गाउँगाउँबाट खेलाडी उत्पादन गर्नुपर्नेमा सबै पालिकाहरु एकजुट हुनुपर्नेमा जोड दिए । साथै ४ नम्बर वडाले वडास्तरमै खेलकुदसँगै शैक्षिक क्षेत्रमा धेरै काम गरिरहेको बताए ।
आयोजकले यसअघि प्रतियोगिताको खेल तालिका सार्वजनिक गरेको थियो । खेल तालिकाअनुसार २८ माघमा हुने उद्घाटन खेलमा मकवानपुर सिमरा भिड्ने भएका छन् ।
उद्घाटन खेलमा नव जनजागृति युवा क्लब सिमरा, बारा र रिगल रिसोर्ट हेटौडा मकवानपुर–११ बीच हुने संघका सुनिल लोप्चनले जानकारी दिए ।
प्रतियोगिताको मैदान व्यवस्थापन लगायत आवश्यक भौतिक पूर्वाधारका कामहरु पनि सबै सम्पन्न भईसकेको लोप्चनले जानकारी दिए ।
ए डिभिजन क्लब, मोफसलका टोली र एक विदेशी गरी कुल १२ टोलीहरुको सहभागिता रहेको प्रतियोगिताको विजेताले उपाधिसहित नगद १५ लाख हात पार्नेछ भने उपविजेताले १० लाख प्राप्त गर्नेछ ।
प्रतियोगिताको सर्वोकृष्ट खेलाडीलाई बुलेट मोटरसाइकल प्रदान गरिनेछ । विधागततर्फ उत्कृष्ट हुने खेलाडीहरुले जनही २५–२५ हजारसहित ट्रफी हात पार्नेछ ।
